नवचैतन्य टाईम्स कराड प्रतिनिधी(संतोष पाटील)- सातारा जिल्ह्यातील कराड तालुक्यामधील वडगाव (उंब्रज) येथील नीलम तानाजी शिंदे या ३५ वर्षीय विद्यार्थिनीचा अमेरिकेत गेल्या ११ दिवसांपूर्वी व्यायामाला जात असताना चार चाकी गाडीने उडविल्याने अपघात झाला. या अपघातात ती गंभीर जखमी झाली आहे. तिच्यावर अमेरिकेतील हॉस्पिटलमध्ये आयसीयूत उपचार सुरू आहेत. मात्र, मरणाच्या दारात असलेल्या मुलीला वाचविण्यासाठी जाणाऱ्या पालकांना मेडिकल इमर्जन्सी व्हिसा मिळत नाही. त्यामुळे पालकांची चिंता वाढली आहे.
कारच्या धडकेत नीलम गंभीर जखमी नीलम शिंदे ही अमेरिकेत गेली चार वर्षांपासून एमएस शिक्षण घेत असून ती शेवटच्या वर्षाला शिकत आहे. नीलम हिचा १४ फेब्रुवारी २०२५ रोजी अपघात झाला. अमेरिकेत व्यायामासाठी चालत जात असताना एका चारचाकी गाडीने पाठीमागून जोरदार धडक दिली. या घटनेत ती गंभीररित्या जखमी झाली होती. या अपघाताला दोषी असलेल्या कारचालकाला पोलिसांनी अटक केली आहे. मात्र, रक्तातील नातेवाईक आल्याशिवाय गुन्हा दाखल होत नसल्याचे अमेरिकेतील पोलीस सांगत आहेत.
नीलम हिचे या अपघातात दोन्ही हातापाय, डोक्याला गंभीर दुखापत झाली आहे. तिच्या छातीलाही मार लागला असल्याने ती कोमात गेली असल्याचे अमेरिकेतील डॉक्टरांनी सांगितले आहे. तसे अमेरिकेतील हॉस्पिटलने पत्र दिलं आहे. तिची रूममेट खुशी ही महाराष्ट्रातील तरुणी असून तिच्याकडून वडगाव (उंब्रज) मधील नीलमच्या पालकांना माहिती देत आहे.
मरणाच्या दारात असताना तिच्याकडे जाण्यासाठी तिच्या पालकांना भारतातून व्हिसा मिळत नाहीये. याकामी केंद्रीय मंत्री मुरलीधर मोहोळ, माजी खासदार श्रीनिवास पाटील, माजी सहकारमंत्री बाळासाहेब पाटील यांच्याकडून व्हिसासाठी संपर्क केला. तरी त्यांनी दाद दिली नाही. मुंबईतील कुर्ला येथे पासपोर्ट व्हिसा ऑफिसला पालक गेले तरीही दाद मिळाली नाही. त्यामुळे अमेरिकेत नीलम शिंदे हिच्या प्रकृतीची चिंता तर भारतात शिंदे कुटुंबियांना व्हिसा मिळवण्यासाठी धडपड करावी लागत आहे. मात्र, त्यांना अजून व्हिसा मिळालेला नाही. त्यामुळे त्यांची मुलीकडे जाण्याची चिंता वाढली आहे.
